автор: Алборова Мадина Валерьевна 6 «Б» класс
Руководитель: Качмазова Мадина Руслановна
Учитель родного (осетинского) языка и литературы МБОУ СОШ № 42
Сочинение «Поклонимся великим тем годам….»
Зынаргъ хӕсты ветерантӕ, фӕсчъылдымы фӕллойгӕнджытӕ!
Рӕстӕг тагъд згъоры. 9 Майы 75 азы сӕххӕст уыдзӕн, Берлины рейхстаджы сӕрмӕ Уӕлахизы Сырх тырыса куы сфӕйлыдта, уыцы стыр бӕрӕгбоныл. Ӕмӕ цас фылдӕр рӕстӕг цӕуы, Фыдыбӕстӕйы Стыр хӕст куы райдыдта, уыцы тугкалӕн бонтӕй, уыйас арӕхӕй-арӕхдӕр ӕрӕмысӕм Уӕлӕхизы бон.
Уыцы Уӕлахизмӕ бирӕ тугвӕндӕгтыл фӕцыдыстут, нӕ буц хъӕбатыр хӕстонтӕ, бирӕ хъӕутӕ, горӕттӕ суӕгъд кӕнын уӕ бахъуыд знӕгтӕй. Ӕмӕ алы ран дӕр уӕхи ӕвдыстат хъӕбатыр ӕмӕ ӕхсарджынӕй. Бирӕ бӕстӕты бон не ссис ахӕм цыфыддӕр тыхджын знаджы ныхмӕ ӕрлӕууын. Фӕлӕ сымах, нӕ намысджын хъайтар хӕстонтӕ, хӕсты фыццаг бонтӕй фӕстӕмӕ хъӕддых фӕлӕууыдыстут зӕххы къори йӕхи бакӕнынмӕ чи хъавыд, уыцы фашисты ныхмӕ ӕмӕ сын цӕхгӕр ӕрӕхгӕдтат сӕ фӕндӕгтӕ. Бӕрзӕйсӕттӕн цӕф ныккодтат ӕрбалӕбурӕг фашисттӕн, ӕмӕ фӕуӕлахиз стут историйы ӕппӕты тыхджындӕр ӕмӕ тӕссагдӕр знагыл.
Цыппар азы дӕргъы иу бон дӕр нӕ банцадысты тугкалӕн хӕстытӕ.
Райдай Баренцы денджызӕй ӕмӕ фӕу Кавквзы хӕхтӕй – уыцы тугуарӕн тохты дыууӕрдыгӕй чи архайдта, уыдон уыдысты 12 милуан адӕймаджы бӕрц, дыууӕрдыгӕй фронты архайӕг танкты, хӕдтӕхджыты нымӕц хӕццӕ кодта дӕсгай минтӕм, алыхуызон артиллерион хӕцӕнгӕрзтӕн, ӕндӕр техникон фӕрӕзтӕн ӕмӕ миномётттӕн та ьанымайӕн дӕр нӕ уыд.
Уыйбӕрц стыр техникӕ ӕмӕ адӕм кӕм архайдта, ахӕм хӕст уымӕй размӕ дунейы историйы никуыма уыд.
Бар мын раттут, ӕмӕ уын зӕрдиаг арфӕ ракӕнон сымахӕн ӕмӕ нӕ хӕстонтӕн-фронтовиктӕн, нӕ хӕстонтӕн — уӕлахизхӕсджытӕн, партизанты къордты фашистты ныхмӕ чи хӕцыд, фӕсчъылдымӕй нӕ хӕстонтӕн чи ӕххуыс кодта, уыцы фӕллойгӕнджытӕн, не стыр Уӕлахизмӕ стыр ӕвӕрӕн чи бахаста, уыдонӕн се ᾿ппӕтӕн дӕр. Сымах ӕмӕ уе ᾿дзард ӕмбӕлтты тугӕй ӕлхӕд у ацы Уӕлахиз.
Ирыстоны ахӕм бинонтӕ нӕ разындзӕн, ӕмӕ уыцы ӕнахъинон хӕсты цӕхӕртӕ кӕй нӕ басыгътой, хъыгдард дзы чи нӕ баййӕфта. Райгуырӕн бӕстӕйы сӕраппонд, фыдызнаджы ныхмӕ хӕцгӕйӕ, нӕ зынаргъ ветерантӕ, уе ᾽мбӕлттӕй бирӕтӕ ӕнустӕм хуысгӕйӕ баззадысты тохы быдыры. Хӕстӕй чи нал сыздӕхт, уыдон рухсаг уӕнт, ӕз сын сӕ рухс нӕмттӕ мӕ зӕрдыл дардзынӕн.
Уыцы тугкалӕн хӕсты цы стыр лӕгдзинад ӕмӕ хъӕбатырдзинад равдыстат, уый махӕй рох никуы уыдзӕн, ӕмӕ махӕй алчидӕрнӕ хъӕбатыр хӕстонтӕн кӕндзӕн стыр аргъ.
Абон ӕз сӕрыстыр дӕн сымахӕй. Уӕ хӕстон сгуыхтдзинӕдтӕ, ӕфсӕддон намыс ӕмӕ мидисджын цардвӕндаг мӕн ахуыр кӕнынц патриотизмыл ӕмӕ рӕсугъд ӕгъдӕуттыл. Сымах стут абон не ᾿хсӕнады фидауц!
Ӕмзонд, ӕмхъару ӕмӕ ӕмвӕнд куы уӕм, уӕд фӕуӕлахиз уыдзыстӕм цавӕрфӕнды хӕрамдзинадыл ӕмӕ фыддзинадыл дӕр.
Мӕ зӕрдӕ уын зӕгъы ӕнӕниздзинад, фӕрныгад ӕмӕ ныфс. Зонын ӕй, ӕнӕ сымах цард фӕмӕгуырдӕр уыдзӕн, баивайдзӕн. Уымӕ гӕсгӕ мӕн фӕнды, цӕмӕй ма нын бирӕ азты дзӕбӕхӕй цӕрат. Уӕлахиз ут, нӕ уӕлахиздзаутӕ.
